ޅިޔަނު މަޙުރަމަކަށްވާނެތޯއެވެ؟ ގާތްކޮށް ހެދުމާއި، އެކަހެރިވުމާއި، ގާތްކޮށް ވާހަކަދެއްކުން ހުއްދަވާނެތޯއެވެ؟
بسم الله الرحمن الرحيم ، الحمد لله رب العالمين، و الصلاة و السلام على رسول الله -صلوات الله و سلامه عليه- وعلى آله و صحبه أجمعين.
أما بعد:
ސުވާލަށް ޖަވާބު ދިނުމަށްވުރެ، އެނގިގަތުން މުހިންމު ވެގެންވާ ނުކުތާއެއްވެ އެވެ. އެއީ އަންހެނާއަށް މަޙްރަމުންގެ ގޮތުގައިވާ ފިރިހެނުންނަކީ ކޮބައިތޯ އެވެ؟
އަންހެނާގެ މަޙުރަމުންގެ މާނައަކީ އަބަދުގެ އަބަދަށް އަންހެނާ އާއި ކައިވެނި ޙަރާމްވެގެންވާ ފިރިހެނުންނެވެ. ޙާލަތެއް މެދުވެރިވެ ވަޤުތީގޮތުން ކައިވެނި ޙަރާމްވެގެންވާ ފިރިހެނުން މަޙްރަމުންގެ ގޮތުގައި ނުވާނެ އެވެ.
މި މަޢުލޫމާތު ނޭނގިފައި ވުމަކީ ނުހަނު ހިތާމަ ހުރި ކަމެކެވެ.
އަންހެން މީހާގެ ޢަޥްރައަކީ އޭގެ މައްޗަށް އަންހެނުން ރައްކާތެރިވުމަށާއި އަދި ޢިއްފަތްތެރި ވުމުގައި ވުމަށް ދީނުގައި ކަނޑައަޅައި ލާޒިމް ކޮށްފައިވާ، ވާޖިބު ކޮށްފައިވާ ޢަމަލެކެވެ. ފަހެ، ޢަޥްރަ މަޙްރަމުންގެ ތެރޭގައިވާ ފަރާތްތަކަށް (އެއީވެސް ހުއްދަ ވެގެންވާ މިންވަރު ފާޅުކުރުމެވެ.) އެ ނޫން ގޮތުގައި ވެއްޖެނަމަ އަންހެން މީހާ އެހިނދު އެވަނީ، ﷲ ގެ ކޯފާގެ ތެރެއަށް ހުށަހެޅިގެންނެވެ.
މަޙްރަމުންނަށްވެސް އަންހެން މީހާގެ ހަށިގަނޑުން ފެންނަން ޖެހޭނެ މިންވަރަކީ އަންހެނުން ޢާންމުކޮށް ގޭތެރޭގައި ލައިގެން ހުންނަ ފޭރާމުގައި ކަޝްފުވާ މިންވަރެވެ. އެއީ މޫނާއި ދެއަތްތިލަ އަދި ދެ ފައިތިލަ އާއި އިސްތަށިގަނޑެވެ. މިއެވެ.
މަޙްރަމުންގެ ގޮތުގައި ކަނޑައެޅިފައިވާ ފިރިހެނުންނަކީ :
1. ފިރިހެން ދަރިފުޅު، މާމަ ދަރިފުޅު (މިފަދައިން ކިތަންމެ ތިރިއަށް ދިޔަކަމުގައިވީނަމަވެސް އެވެ.)
2. ބައްޕަ، ކާފަ، މުނި ކާފަ (މިފަދައިން ކިތަންމެ މައްޗަށް ދިޔަ ކަމުގައިވީނަމަވެސް އެވެ.)
3. ބޭބެ : އެއްބަނޑު އެއްބަފާ ނުވަތަ އެއްބަފާ ނުވަތަ އެއްބަޑު ކަމުގައިވީނަމަވެސް އެވެ.
4. މަންމަގެ ބޭބެ (ބޮޑު ބޭބޭ) މާމަގެ ބޭބެ (މާމަގެ ފަރާތުން، މަންމަގެ ފަރާތުން، ނުވަތަ ބައްޕަގެ ފަރާތުގެ މާމަގެ ބޭބެ ކަމުގައިވީނަމަވެސް އެވެ.)
5. ބައްޕަގެ ބޭބެ (ބޮޑު ބޭބެ)، ކާފަގެ ބޭބެ (މަންމަ ފަރާތުގެ ކާފަގެ ބޭބެ ނުވަތަ ބައްޕަ ފާރަތުގެ ކާފަގެ ބޭބެ ކަމުގައި ވިނަނަވެސް އެވެ.)
6. ބޭބެގެ ފިރިހެން ދަރި (އެއްބަޑު އެއްބަފާ ބޭބެ ނުވަތަ އެއްބަނޑު ނުވަތަ އެއްބަފާ ބޭބެގެ ފިރިހެން ދަރިންނެވެ.) ، ދައްތަގެ ފިރިހެން ދަރި (އެއްބަނޑު އެއްބަފާ ދައްތަ، އެއްބަފާ ދައްތަ އެއްބަނޑު ދައްތަގެ ފިރިހެން ދަރިންނެވެ.)
7. ކިރު ދިނުމުގެ ސަބަބުން : ކިރުދިން އަންހެން މީހާއަށް ހަރާމްވާނީ އޭނާގެ ގާތުން ކިރު ބުއި ފިރހެން ކުއްޖާ އާއި އަދި އެކުއްޖާގެ ފަރާތުން އަންނަ ދަރިންނެވެ. ކިރު ދިން އަންހެން މީހާއަކީ ނަސަބުގެ ގޮތުން މަންމަފަދަ އަންހެނެކެވެ. އެހެން ވުމުން އެ މަންމަ ކައިރިން ކިރުބުއި އެންމެން ވަނީ ކައިވެނި ޙަރާމްވެގެންވާ ފަރާތްތަކެއްގެ ގޮތުގަ އެވެ.
8. ކައިވެނި ކުރުމާއި އެކު ފިރިމީހާގެ ފިރިހެން ދަރިން (ދޮން ދަރިންނެވެ.) އަދި ފިރިމީހާގެ ކާފަ ދަރިންވެސް މެ އެވެ.
9. ކައިވެނި ކުރުމާއި އެކު ފިރިހެން މީހާގެ ބައްޕަ (ބަފައިބެ އެވެ.) އަދި ބަފައިބެގެ ބައްޕަ މިފަދައިން ކިތަންމެ މައްޗަށް ދިޔަކަމުގައިވީނަމަވެސް އެވެ.
10. ކައިވެނި ކުރުމާއެކު، އަންހެން ދަރިފުޅުގެ ފިރިމީހާ (ދަނބިދަރި)
-މިއީ ސުވާލުގައި ބުނެފައިވާ އެކަކެވެ- އަންހެން ދަރިފުޅުގެ ފިރިމީހާއަކީ މަޙްރަމެކެވެ.-
11. ކައިވެނިކޮށް އެއްދާން ކޮށްފިނަމަ، މަންމަގެ ފިރިމީހާ (ދޮންބައްޕަ އެވެ.) އަދި މިފަދައިން މާމަގެ ފިރިމީހާވެސް ވެ އެވެ.
އަޚާ އެވެ! އުޚްތާ އެވެ! އަންހެނުންގެ މަޙްރަމުންގެ ގޮތުގައިވާ ފަރާތްތަކަކީ މި އެވެ. ގޭތެރޭގައި ލައިގެން އުޅޭ ޢާންމު ހެދުމުގައި އަންހެން މީހާ ފެނުން ހުއްދަވެގެންވާ ފަރާތްތަކަކީ މި އެވެ. މިއީ އެބަޔަކާއި ވާހަކަ ދައްކައި އަދި ގާތްކޮށް ހެދިދާނެ ފަރާތްތަކެވެ.
އަޚާ އެވެ! އުޚްތާ އެވެ! ފިރިމީހާގެ ފިރިހެން ކޮއްކޮ ނުވަތަ ފިރިމީހާގެ ބޭބެ (ޅިޔަނުން) މަޙްރަމުންގެ ގޮތުގައި ނުހިމެނެ އެވެ.
އެއީ އަންހެންމީހާއާއި އެއްވެސް ގުޅުމެއް އޮވެގެންވާނެ ފިރިހެނެއް ނޫނެވެ. ހަށިގަނޑުގެ އެއްވެސް މިންވަރެއް ހާމަކުރެވޭނެ ފިރިހެނެއް ނޫނެވެ. އަންހެން މީހާއަށް ހިލޭ ފިރިހެނެކެވެ. ބުރުގާ ނަގައިގެން އުޅުން ހުއްދަވާނެ ގޮތެއް އޮންނާނެ ހެއްޔެވެ؟ ހިލޭ ފިރިހެނެކެވެ.
މި ނޫން ފިރިހެނުންނަކީ އަންހެން މީހާގެ ހަށިގަނޑުގެ އެއްވެސް ބައެއް ފާޅުކުރުމާއި ހާމަ ކުރުން އަދި ގާތްކޮށް ހެދުމާއި، އެކަހެރިވުމާއި، ގާތްކޮށް ވާހަކަދެއްކުމާއި މި އެންމެހައި ކަންތަކެއް އެ ފިރިހެނުންގެ މައްޗަށް ޙަރާމް ކުރައްވާފަ އެވެ.
ގާތް މީހުންނޭ ބުނެ އެވެ. ޢާއިލާ މީހުންނޭ ބުނެ އެވެ. ދެކެ ފަރިތަ މީހުންނޭ ބުނެ އެވެ. ކުރީގެ ވެސް އަދި މިހާރުވެސް ރައްޓެހިންނޭ ބުނެ އެވެ. ތިމާގެ މީހުންނޭ ބުނެ އެވެ.
ދަންނަ އެވެ! މިފަދަ އެއްވެސް ބަހަކީ ﷲ ޙަރާމް ކުރައްވާފައިވާ ހައްދުތައް އޭގެ އިންތަކުން ފަހަނައަޅައި ދެވޭނެ ހުއްދަ ޙާލަތްތަކެއް ނޫނެވެ. އަދި ކިޔެއްތަ! މިއީ ހައްދު ފަހަނައަޅައި ދިއުމެވެ.
މިއީ ﷲ ލައްވާފައިވާ ޢަދުލުވެރި ޝަރީޢަތުގެ މައްޗަށް ޙައްދު ފަހަނައަޅައި ދިއުމެވެ.
ﷲ ވަޙީ ކުރެއްވި އެވެ.
تِلْكَ حُدُودُ اللَّهِ فَلَا تَعْتَدُوهَا
މިއީ ﷲ ކަނޑައަޅުއްވާފައިވާ އިންތަކެވެ. މި އިންތައް ފަހަނައަޅައި ނުދާ ހުއްޓެވެ.
ޅިޔަނުންގެ މައްޗަށް ސަމާލުވުމަށާއި އެކަމުގެ ނުރައްކާތެރިކަން ބަޔާން ކުރައްވާ މާތް ނަބިއްޔާ ހަދީޘް ކުރައްވާފައިވެ އެވެ.
(إيَّاكُمْ والدُّخُولَ علَى النِّساءِ فقالَ: رَجُلٌ مِنَ الأنْصارِ:يا رَسولَ اللهِ، أفَرَأَيْتَ الحَمْوَ؟ قالَ: الحَمْوُ المَوْتُ)
ތިޔަބައިމީހުން އަންހެނުންގެ ތެރެއަށް ވަދެގަތުމުގެ މައްޗަށް ތިމަން ނަބިއްޔާ އިންޒާރުދެމެވެ. އެހިނދު އަންޞާރުންގެ ތެރެއިން ބޭކަލަކު ދެންނެވި އެވެ.
ﷲގެ ރަސޫލާ އެވެ. ޙަމޫ (ޅިޔަނު) ކިހިނެތްތޯ އެވެ؟ (ޔަޢުނީ : ޅިޔަނުގެ ޙުކުމަކީ ކޮބައިތޯ އެވެ؟)
ޙަދީޘް ކުރެއްވި އެވެ. ”އެއީ ތިބާގެ މަރެވެ.“
މިއީ ޅިޔަނުންގެ ވާހަކަ ދެކެވުނުހިނދު، ނަބިއްޔާ ދެއްވި އިރުޝާދެވެ. އެއީ އެމީހެއްގެ މަރު ކަމުގަ އެވެ. މިއީ ”ކޮއްކޮގެ ފިރިމީހާ“ ”ބޭބެގެ އަންހެނުން“ ނޭ ބުނެ ލުއިކޮށްފައިވާ، މާ ބޮޑު ކަމެއްގެ ގޮތުގައި ނަހަދާ ކަންތައްތައް ކުރާ މީހުންގެ މައްޗަށް ނަބިއްޔާ ދެއްވި އިރުޝާދެވެ.
ގިނަ މީހުން ދެކޭގޮތުގައި، ކޮއްކޮގެ ފިރިމީހާ ބުނެ، ޢާއިލާގެ ތެރޭގައިވާ އެހެން އަންހެނުން އެއީ ލުއި ކަމެއްގެ ގޮތުގައި ދެކެން ފަށަ އެވެ.
ބޭބެގެ އަންހެނުން ވީމައި އެއީ ލުއި ކަމެކެވެ. މައްސަލައަކަށް ނުވެ އެވެ. ”ބޭބެގެ އަންހެނުންނެއްނުން“ މިފަދައިން ބުނެވެ އެވެ.
ދަންނަ އެވެ! ޅިޔަނުންނަކީ މަޙްރަމުންނެއް ނޫނެވެ. އަދި މަޙްރަމުންގެ ޙުކުމެއްވެސް ނުލިބޭނެ އެވެ. އެއީ ހިލޭ ފިރިހެނުންނެވެ. އަދި ފަހަރި އަކީވެސް ތިމާގެ މައްޗަށް ހިލޭ އަންހެނެކެވެ.
ގައިގޯޅި ވުމާއި، ޗެޓް ކުރުމާއި، އަނގަތެޅުމާއި، މަޖާކޮށް ސަކަރާތްޖެހުމާއި، ދެ މީހުން ވަކިވެގަތުން މިއީ ހުއްދަ ނޫން މުޢާމަލާތްތަކެވެ. އެއްވެސް ޙާލެއްގައި ހުއްދަވެގެންވާ ކަންތައްތަކެއް ނޫނެވެ.
މިއަދު ޢާންމުވެފައިވާ ”ޅިޔަނުންނާ އެކުގައި ސައިކަލް ބުރެއް“ ”ފިރިމީހާގެ ކޮއްކޮގެ ސައިކަލް ފަހަތުގައި“ މިފަދައިން ބުނެ ލުއި ކަމެއް ގޮތުގައި ހެދި މި ވަނީ މި ޙަރާމްވެގެންވާ ޢަމަލަށް އެތައް ބަޔަކު އަރައިގަނެފަ އެވެ.
و الله المستعان
والله تعالى أعلم. وصلى الله على نبينا محمد وآله وصحبه وسلم.
